廚十三老壇酸菜魚 (太子集團中心) (已結業)

終於唔洗北上都可以喺香港食到好味嘅酸菜魚嘞~之前見飲食專欄介紹呢間廚十三老壇酸菜魚係由深圳太二酸菜魚班底開設，食過之後果然名不虛傳，好有太二的風格同口味。我地2個人叫咗3人份量，超大碟嘅酸菜魚，排場氣勢就好似喺深圳食嘅咁，2個人食，份量剛剛好，酸菜魚嘅辣度夠晒辣，除咗有又大片、又厚、又滑嘅新鮮鱸魚片，仲有好多酸菜、蓮藕片、豆腐。另外叫咗碟夫妻肺片，有牛展、金錢肚、牛舌，辣度比酸菜魚更辣，牛展份量都好多，好入味，但就嫌牛展太硬，我就較鍾意金錢肚，彈牙入味。餐廳以卡位為主，亦有做好防疫隔板，座位仲有USB充電位，最啱邊食邊打卡用到電話冇電嘅客人，好貼心嘅設備。見到餐牌有午市酸菜魚2人套餐，只係$168，好想下次早D再去食。