小娘惹 (已結業)

Book mark 左呢間餐廳好耐，首先係喺蘋果肥佬黎嘅節目入邊見到佢嘅介紹，一直都想去，去過三次都碰門釘，因為佢嘅營業時間剩係得晏晝，而且有啲大時大節都唔開。越係食唔到就越係想食🤣🤣🤣我都有啲擔心會唔會因為咁，期望越大失望越大。最後佢真係冇令我失望，我點左招牌娘惹海蝦喇沙。首先一定要讚嘅係佢個湯底，又鮮又滑又creamy又重喇沙味，飲個湯都唔會覺得口渴。然後要讚嘅係佢真係好足料，有三隻好新鮮又大隻海蝦、獅蚶、豆卜。海蝦鮮甜肉實，獅蚶無泥味又夠鮮。食到我真係開懷歡笑🥰🥰🥰🥰🥰好幸福！另外都叫咗海南雞飯，呢個雖然都OK，但比起來就相對地失色。我覺得佢雞件唔係好夠滑，而且醬料味道正正常常啦，油飯我覺得如果可以再香d就更加開心啦。如果大家想食，記得上社交平台睇咗佢開放時間先，同埋有心理準備要等位啊，我哋都等咗成九個字先入到去。