傷心酸辣粉 (已結業)

成日Ｄ朋友都問我呢無辣不歡的人有無食過呢間野，老實講雖然佢好近我屋企，但我今日都係第一次去食！其實行前幾間鋪佢有間分店可以坐得舒服好多，但為左試真Ｄ味，我都係去左總店！同我平時去的四川鋪一樣，一入去就見到個個枱都有碗充滿紅油的酸辣粉，因為想試真佢Ｄ味，所以平時叫中至大辣的我，叫左小辣，因為下晝３點幾（無乜人坐得幾舒服），天氣熱又無胃口，所以無叫餐（套餐都唔平），只係加左＄６／２隻雞亦做餸。雖然佢成碗紅油咁，但佢的小辣比一般雲南、四川鋪低，當然好似我呢Ｄ鍾意食紅磡橋底川王的超級辣人來講，絕對唔會滿足，但佢有樣野比其他鋪頭好，你食食下發現唔夠味，可以個別淨加酸、加辣和加麻。平時我食四川野好少飲埋湯的，因為怕油，但今次為左試真Ｄ就飲左，幾驚喜的，因為Ｄ湯真係幾好飲，如果唔食得辣都可以試佢個豬骨湯紅薯粉。唔知係咪平時無人會飲埋Ｄ湯，老闆見我飲湯好似當我珍禽異獸咁。講起老闆，老闆坐我隔離等我落單，係總店你只會聰到一個歌手的歌就係──譚詠麟，老細真係愛到佢發哂狂，因為聽都唔夠仲要一路唱住，我ＯＫ頂得順，但如果唔鍾意嘅朋友就自己衡量下啦！雖然唔係好辣，但Ｄ湯辣椒素的含量都幾高，食來發汗去濕都唔錯！