影片
更多
2013-07-02
220 瀏覽
雖然小弟唔喺泰菜粉絲，但都幾鍾意食泰菜，因為煮泰菜用唔少香料，就以咖喱為例，黃咖喱、青咖喱、紅咖喱……都不下三幾款，菜式味道多變。今晚有幸掹車邊跟食友同嚟位於灣仔嘅「曼谷泰菜」試菜，席間傾開先知原來總店晌北角，仲有其他分店開設於天后、小西灣、沙田、屯門等地，而依間灣仔分店都喺開咗1個月多啲 。此外，有專營批發嘅集團作背後支援，貨源及價格相對佔優，做到所需嘅泰國材料都由泰國空運直送 。另外，所有店舖都用上泰藉廚師，不過，北角及天后店嘅侍應就全泰藉，其他分店就一半一半，好似嚟依間灣仔店，就唔怕溝通唔到。餐廳唔似一般晌九龍城見嘅泰菜館咁滿天神佛，裝修較為摩登啲，木地板、仿磚牆配芥辣黃梳化，感覺醒目 ，而周圍又掛有少少泰式木刻或泰式擺設。座位以卡位為主，亦有三幾張馬蹄形梳化，不過最正喺入門口左邊嘅貴賓房，坐到8-10人，空間感足，私隱度高 ，以平日而言，暫時仲未設有最低消費或其他限制 。精緻嘅餐牌中，款式一共分為10類，依次為小食、沙律、湯類、海鮮、咖喱、小菜、飯類、河粉及金邊粉、甜品、飲品。店方都安排都好細心，除河粉及金邊粉外，基本上每個類別都有挑選當中手本嘅菜式等我哋品嚐。 泰
餐廳唔似一般晌九龍城見嘅泰菜館咁滿天神佛，裝修較為摩登啲，木地板、仿磚牆配芥辣黃梳化，感覺醒目 ，而周圍又掛有少少泰式木刻或泰式擺設。座位以卡位為主，亦有三幾張馬蹄形梳化，不過最正喺入門口左邊嘅貴賓房，坐到8-10人，空間感足，私隱度高 ，以平日而言，暫時仲未設有最低消費或其他限制 。
精緻嘅餐牌中，款式一共分為10類，依次為小食、沙律、湯類、海鮮、咖喱、小菜、飯類、河粉及金邊粉、甜品、飲品。店方都安排都好細心，除河粉及金邊粉外，基本上每個類別都有挑選當中手本嘅菜式等我哋品嚐。泰式蝦片 $13
一早已放有一籃晌枱上，咪以為喺必然嘅餐前小食，其實已經喺餐牌中嘅其中一款小食，非常香脆可口，又有點鹹蝦味，一籃又點夠喉吖？唔該，俾多籃吖！
串燒沙嗲（豬、牛、雞）$78 / 半打，$130 / 1打 牛肉用上本地新鮮貨，而豬肉及雞肉則用冰鮮貨色，但集團本身晌國內有自家農場，冰鮮雞都做到即日送到，所以質素不下於新鮮雞，而且，所以醃肉工序都晌柴灣中央廚房搞掂晒，保持每店質素平均、穩定。各款串燒都帶點炭火香，肉質不俗，尤其雞肉，確喺軟腍，串燒之上已淋咗椰漿奶，當然，蘸自家炒製嘅沙嗲梗唔少得啦！
金柚子蝦球沙律 $88 唔講真喺唔知，原來啲金柚跟有時晌超市見到嘅黃色金柚唔同，柚子取自泰國青綠色嘅金柚，一樣清甜多汁，最難得喺拆柚肉唔會碎濕濕，而喺大大嚿，好有睇頭 ，加埋花生碎、魚乾仔、乾蔥及椰子乾片，好豐富嘅口感；再者，啲蝦球又爽彈，喺是日嘅推介之一 ！
冬蔭公湯 $82（2位用）$158（4位用）$198（6-8位用) 冬蔭公有唔同份量，好有彈性嘅安排。眼前依個喺6-8人份量，其後都仲有得添湯，所以10個人都夠飲 。單睇色澤已經夠惹火真想冒汗，但飲落其實微辣唔嗆喉，店主提醒話為遷就港人關係，希望人人都試得到，好多辣嘅菜式晌辣度方面有所調低，如果你頂得辣，就不妨開聲要求佢哋做番地道嘅辣度，包保食得過癮。此外，湯中用料不賴，大大隻嘅大頭蝦清晰可見，又放有好多草菇，加埋多種泰式香料，酸香微辣，醒胃非常 。
泰山北斗 $328 真喺搲頭嘅菜名，無非都喺參賽作品改名改得型啲，其實餐牌中已列明喺一道青胡椒薄荷蟹，由泰籍總廚設計，晌本地嘅食神爭霸戰中嘅獲獎菜式。其實晌海鮮類一欄，都有唔少蟹菜式，如招牌咖喱炒蟹、辣椒羔炒蟹、乾炒蒜香蟹……等等，但既然喺得獎菜，自然有其吸引地方。雖然外觀有啲「嚇人」，但香味絕對突出，以金不換、青胡椒、薄荷葉、魚露、青檸……20多種香料製作，香味層次當然不言而喻 ；選用肉蟹，而且夠晒大隻，肉多味鮮，除香料味，亦帶少許辣，令蟹肉更覺鮮甜 ，不過，唯一可惜喺個汁醬有啲過鹹，要扣分 ！
黃咖喱牛肉 $88．焗蒜蓉包 $33（5件）咖喱菜式都唔少，共10款之多，黃咖喱、青咖喱、紅咖喱，有豬牛雞、雜菜、蝦球、魚柳，相信都總會搵到啱你心水。店家安排個黃咖喱配牛肉，黃咖喱嘅辣度同樣溫和，較重椰香味，牛肉軟腍，又加上有好多配菜，如紅黃綠燈籠椒、洋蔥，仲有唔好錯過墊底嘅薯仔，炸過所以外皮有點脆，內裡好鬆化，又有薯味。剩番嘅咖喱汁當然唔好嘥，配白飯（$13碗）故然好，精啲就可以叫個雞油香飯（$16碗），但搵香脆嘅蒜蓉包蘸咖喱汁，蒜香夾咖喱，就更添滋味 ！
芭提雅燒雞 $118 / 半隻，$198 / 全隻賣點喺選用飼養咗105日嘅走地雞，完全唔打激素，只喺簡單醃過炭火燒香。所以，雞隻燒得金黃，而肉質挺嫩，再點一點泰式酸辣醬，味道不俗。
荔枝蝦球（價錢待定） 除上述嘅燒雞喺屬於小菜菜式，依個荔枝蝦球將來都可能列為小菜菜式，將來？因為依道喺新菜，暫時仲未加入餐牌中，能先試為快，實在好感謝店方安排。以原粒荔枝包住去殼嘅緬甸蝦，蘸上粉漿酥炸，咬落先喺外層嘅鬆脆香口，跟住荔枝嘅清甜濕潤，再加上蝦肉嘅爽口彈牙 ，真喺簡單嘅組合，驚喜嘅配搭，實在唔可以唔推介囉 ，希望店方早日推出，等大家都試到依味夏日新菜！
香焗芋頭飯 $78 飯類晌度都無求其，十多款炒飯、焗飯，各具特色。香焗芋頭飯，飯內加入香芋、肉碎、冬菇、芹菜、蝦仁、薑絲、蔥度……等等，用料豐富 ，飯粒又軟綿綿入味，實屬心機之作 。由於依個焗飯製作需時，約20分鐘，有心試就預早落單。
大樹菠蘿冰 $38 除一般咖啡、奶茶、檸水都有供應外，嚟到泰國餐廳又點可以唔叫啲泰式特飲吖。小弟一向都鍾意榴槤呀，大樹菠蘿呀，依類重口味嘅東南亞水果，所以飲品就當然點杯大樹菠蘿冰啦。冰凍嘅椰奶做底，好濃椰香，又有好多大樹菠蘿果肉，一絲絲浮晒晌杯面，又爽又正呀 ！題外話，據食友分享，依度嘅椰青（$45）亦都不俗，原來椰青每個星期都會返兩次貨，貨源新鮮。
去到尾聲，又喺甜入心嘅時間，除咗一道香芒椰汁糯米飯之外，加埋一份泰式甜品拼盤為今餐作結，真喺完滿嘅一餐。
香芒椰汁糯米飯 $48 以芒果片砌出玫瑰花形，賣相已經討人喜悅，更教人驚喜喺糯米飯用上紫糯米及白糯米，前者煙韌，後者軟糯，又沾滿濃濃椰漿，芒果採用呂宋芒，果肉芳香甜蜜，真喺非常好食 。
泰式甜品拼盤 $48 / 6件，$78 / 10件
甜品菜單中仲有其他地道甜點，如果心多，不妨要份大嘅泰式甜品拼盤，包括：椰汁木薯、椰絲芝麻糯米糍、椰汁千層糕、椰汁西米糕、椰汁大菜糕，款款2件。木薯口感有啲似食緊蕃薯，幾有趣；糯米糍稍嫌個皮韌啲，但面面鋪滿椰絲搭芝麻，味道蠻香；千層糕四四方方，一層椰汁一層班蘭，清甜好味；而西米糕內裡又加入咗少少栗米粒，多份爽脆；至於大菜糕，相對較為大路普通！
最後晌門口拎走張單張，原來喺到會單張嚟，「Gourmet Thai Express」喺集團旗下一員，由冷盤、小食、熱盤到甜品，一應俱全，咁無論公司好定晌屋企好，搞派對就唔使次次都叫薄餅啦，泰菜到會有啲新意嘛 。
張貼
