荔園茶餐廳 (已結業)

今日去開尖咀，之前見佢裝修後推過下宣傳，都會想黎試下，但同期望相差好遠。Set dinner選擇4款，我唔食得牛，4款有2款牛，一款豬，同一款海鮮。同朋友各自點左餐，餐湯得紅湯，真心講句，普通茶餐廳都會有2款湯，呢間嘢咁揼本，竟然慳嗰啲白湯罐頭。佢仲要落得勁辣椒油，啲油令到反光，對唔食辣嘅我黎講真係擺埋一邊算。朋友係咖哩牛，佢話味道好普通，唔可以用好食黎形容，佢個意粉食兩啖已經唔想再食。我係蕃茄焗豬扒飯，第一次食個蕃茄焗豬扒可以冇乜蕃茄味，仲要個炒飯底都冇咩味，清淡到我以為去左出面標榜建康餐嗰啲餐廳。而個焗盤好淺，飯量不多，可能我大食啦～食完已經諗去邊食個甜品填番肚添呀！間嘢裝修超普通，冇咩客，連我坐嗰枱先得4枱人，total5個客。做開F&B back office嘅我職業病發數佢樓面3個人，1個收銀連1個水吧，但係竟然係冇服務，成班人圍喺水吧前。雖然我地有餐飲，但我地叫佢俾熱水杯水唔熱，我唔信水吧冇電熱水撐。真係不值一試。