Shari Shari Kakigori House 氷屋

營業中

休息中

旺角分店啲冰同其他分店都係差不多質素，幾綿密，不過莓類嘅冰好似都係偏酸，下次會食返其他～不過想講呢間分店啲服務真係搞唔掂，之前有幫襯過銅鑼灣同中環都冇發生過以下情況。我係早排去食，個職員喺我排隊嘅時候就收咗現金，但遲遲都唔找錢，單又冇張，好似唔打算找咁，催咗幾次都話等陣先，而冇幾耐竟然就找咗錢畀我下一個號碼嘅客，到我坐低咗先找返畀我。坐我隔籬枱嘅客又係坐低咗先收到找錢，而且職員仲要找錯錢。仲有落單嘅時候問加錢要配料（我揀咗消化餅碎）係咪會加喺個冰入面，門口個職員好肯定咁答係，但上枱嘅時候分開咗上。再問之下，個職員竟然建議我不如就咁倒喺上面食，仲同我講「如果唔係個客特別要求嘅話係唔會分開上」，講到好似我屈佢哋咁，嗰下真係躁咗。最後我話唔要，要求退錢（碗餅碎我冇掂過），個職員就話問下先，然後搞咗好耐都冇處理到，又催咗兩次，個職員好似有少少不滿咁話「唔好意思我哋而家有啲亂，介唔介意等多陣」，但眼見佢哋又唔係送緊冰，只係行嚟行去唔知做乜，想問亂咗喺邊。雖然個職員最後有退返錢畀我，但我真係覺得處理得好差。冇咩事真係唔會再去旺角分店食。