山東小城 (埃華街)

營業中

休息中

做左一輪嘅功課，發現十個有八個都會推介呢間餃子店，首推係少見嘅墨魚餃，熱愛餃子嘅我，當然已經心心眼!!🙊墨魚荸薺餃 $55十隻餃子上枱果陣已經聞到墨魚腥味，老實講，氣味唔討好😂，好彩食落無腥味。茡薺原來係馬蹄，所以有爽口感，亦食得到墨魚粒；餃皮係滑口感，而唔係彈牙感，我個人比較中意後者😅，加上熱度唔夠，內餡只係溫暖狀態，確實令我有點失望😐。京蔥羊肉煎餃 $34五隻呢個煎餃熱度比墨魚餃高，食得出係新鮮煎出黎。友人一咬就噴汁😯，表示驚訝，無諗過肉汁如此澎湃；內餡有羊羶味，濃度我可以接受；最中意佢真係煎出黎，而唔係炸，因為坊間好多煎餃其實係炸餃。蔥油餅 $28由於我地4個已經食過正餐，但又唔好意思只點2款野，唯有點埋呢個餅。蔥餅煎到兩面脆，味道同超市買果D分別唔大。