味帝漢堡 (已結業)

星期日中午十二點，天氣近乎零度，係大角咀既街頭，真係冇咩鋪頭開左門。成朝未食過野，饑寒交迫，要我再繼續行，真係好需要食野！見到一間小鋪有開，一於行埋去睇下！ 鋪頭其實只係細細間，座位唔多，賣點係漢堡。不過又凍又餓，再唔食野真係會凍死係街頭，咩都唔理，食左先講！ 餐牌都多野食，除左主打漢堡，又有沙律，薯條等等。叫左個德里香辣烤雞堡餐，加錢轉窩蛋芝士薯條，汽水。 窩蛋芝士薯條好吸引，其實自己本身勁鐘意食芝士薯條，所以都食過好多唔同餐廳既芝士薯條。然而，今次又比到一個新鮮感我。加左窩蛋既芝士薯條口感更滑，少左一份煎炸既感覺，多左一份蛋香。食起上嚟會有黏黏既感覺，同時又有絲絲連住既芝士。更加吸引既係食落都唔覺多油！ 德里香辣烤雞堡整緊既時候已經聞到陣陣香味。成個漢堡都好大個，我咁大個咀要一啖咬晒都有d難度。烤雞好大塊而且多肉，雖然雞係大件，但就煮得夠火喉，所以咬落夠淋。個醬只係帶微辣，但同烤雞幾夾，有印度風味。嚴寒之下食飽飽，又可以繼續上路。