膳德福素食 (已結業)

以下所講嘅完全係我親身經歷，親眼望見。話說當日等左接近30分鐘，跟住被安排坐去廚房旁嘅位置，果度係分左２個廚房，一個係開放式應該係整炸物同埋壽司等等嘅食物，另一個廚房係整熱食嘅。當時都感覺不太良好，因為見到整壽司嘅位置同埋走廊位都唔太乾淨，咁都冇理咁多，同朋友揀野食，跟住我同朋友叫左一碟軟殼蟹卷，一個南乳齋煲，一個白飯，喺等候期間其實一直見到整壽司嘅師傅徒手周圍摸，無論去雪櫃還是拎D咩都係徒手去拎，最大問題係佢整壽司嘅時候係無帶手套，我心諗其實出面食野應該好多都係咁，只係眼看不見為乾淨，咁就算啦照食。戲肉嚟喇，徒手整壽司嘅師傅行出壽司廚房去雪櫃拎一D類似係一塊一塊薯餅物體嘅炸物出黎，佢拎唔實跌左一塊落地，撻地塊地毯係勁污糟.....，我咁啱望到，我見住佢將跌左落地果塊炸物若無其事咁拎起，放返入壽司枱度，過左一陣，我見到佢拎住塊炸物同炒餸廚房嘅一位師傅徒手交收，就好似田徑比賽交棒咁樣嘅方式交法，我果下O左咀，其實我相信出面食野好多時都會咁樣，唔好浪費丫嘛，但係亦都好希望做食肆嘅都注意下衛生，Ｄ野係食落人口，如果有咩事都會係損人亦不利己。