回到味來 (已結業)

初初聽到回到味來，總係覺得好有科幻的感覺，一啲都聯想唔到係食什麼菜式。好彩唔止我一個無知，谷友已經出聲問，負責book位嘅朋友講餐廳主打係食雞煲。唔講真係好難聯想到雞煲是回到味來的重點。先上一個雞煲，吃完後就可以換湯底，再食牛肉同埋其他任點火鍋配料。仲有串燒食啦。雞煲望上去好似冇咩汁，不過煮滾咗就正正常常。雞肉嫩滑，辣辣地好惹味，我地添咗1次。推介一定要食埋D紫洋蔥，同雞煲味道好夾，我地搶住食！之後食串燒，款式好多，最好係已經燒好可以即食，好過要自己再慢慢燒。記憶中較特別有台灣腸及日本甜薯，好好食。打邊爐其實都已經飽咗一半，不過唔好浪費，要食埋D牛肉呀嘛。牛肉唔會過肥，又唔會好韌。自助配料櫃目測應該有幾十款，不過我地就真係試得唔多，個個已經嗌好飽。又有雞煲又有串燒仲可以任飲，每人3百蚊都唔使，性價比超高，一定要再去啦~