北海道爐端燒 (已結業)

啱啱喺日本返嚟，放唔低想食日本野嘅嗰種感覺，今日收工就去咗附近嘅北海道爐端燒再次品嘗，估唔到平日嚟到都咁多人，好彩訂左位 唔係就可能有排等了。裝修嘅風格有日式居酒屋嘅味道，有啲位置係榻榻米，但係我哋都係揀咗比較舒服嘅普通位坐。一嚟到就已經叫咗最出名嘅甲羅燒（蟹蓋）一個選擇咗海膽魚子蟹膏燒，另一個就簡左蟹肉蟹膏燒，個蟹蓋雖然細細個但係充滿着蟹膏，燒熱左再撈埋d配料，一啖食落口超滿足，蟹味濃郁鮮甜而且一啲都唔腥，而且加左鵪鶉蛋令到口感更加滑。小食我哋仲叫咗日式炸年糕 呢度真係炸到外脆內軟 咬落去嘅時候年糕入面仲係流心 同日本食嘅感覺一樣主食方面，叫咗好出名嘅芝士意大利麵，但係可能今日太多人，所以店員冇拎到成舊芝士出嚟表演，但係一啲都冇馬虎，面嘅質感有咬口 而且芝士都唔會太膩，都好好味。最後黎到居酒屋梗係要介紹返酒，我地點左呢隻黑糖梅酒，超容易入口，而且咩都唔使加已經好好飲，就算女士都會鍾意。