尚鮮海鮮料理 (已結業)

呢排home office成日都係屋企食飯，當然耐唔耐都要同朋友出去食飯見個面。今次就試吓呢一間尚鮮海鮮火鍋料理，係一間食私房菜同埋有火鍋嘅店舖嚟嘅。一入到去，見到個環境好舒服，啲卡位係有板隔住嘅，所以私隱度都幾高。有趣嘅係，啲卡位入面係有個小小嘅電腦比大家睇㗎! 坐低嘅時候，店員即刻為客人噴上酒精搓手液等我哋清潔雙手，做好防疫措施。店員嘅服務態度都好好，好熱情咁向我哋介紹佢嘅Menu同埋招牌菜。今次我哋嗌左個花膠燉雞象拔蚌同埋尚鮮串燒酒云拼盤。先講咗個花膠燉雞象拔蚌先，一上菜嘅時候，店員捧咗一大鍋蟲草花花膠燉雞湯，望落去已經覺得好足料，勁多花膠同蟲草花，好香，飲第一啖嘅時候真係哇咗一聲，超級好味！佢哋話如果客人想嗌呢一個湯，係要預先訂位架! 因為店舖要用3-4個鐘去熬呢煲湯，真係落足心機同時間。再加上象拔蚌刺身非常鮮甜，呢個配搭真係一流！個湯都幾大㗎，可以分到七至八碗。如果要打邊爐，大家可以選擇每人飲咗一碗湯，再加上湯打邊爐，一舉兩得。另外串燒拼盤都非常吸引，有燒海蝦，燒生蠔，燒牛柳粒，燒牛舌等等。我覺得最好食係串燒牛舌，好入味同埋好厚，口感一流。加埋一人一杯沖繩生啤，真係好好嘅配搭