大利清湯腩 (已結業)

大家都總愛對大利同華姐依兩間姊弟鋪比較一下，因此本蟲都決定實地考察一下。先講服務，明顯大利的侍應好似較有經驗，人人都以嫻熟嘅手法招呼顧客，不過唔知係咪做得太耐做到純晒，佢哋好似差咗少少笑容，面口有啲木訥，所以技術上佢哋較佳，但態度上華姐嗰邊就好似佔優。食品方面，華姐除咗傳統嘅牛腩麵外加咗唔少小食入餐牌度，而且無因此影響首本菜嘅質素；而大利就十年如一日咁賣佢哋嘅清湯腩，最大嘅變化都只不過係有咖喱湯底揀，睇嚟有啲固步自封。品質控制方面，大利有時有啲飄忽，如果發揮到最佳時，華姐可能稍遜一籌，但大利有時會整到啲腩好韌，咁就對整體形象大打折扣。所以縱合嚟講，我覺得華姐做得較現代化，平均嚟講質素較有保證，但大利就勝在傳統手法，心情好時會有大師級水準，遇唔遇到就睇顧客嘅彩數。