一樓咖啡室 (已結業)

容許我講：一流嘅位置， 九流嘅食物！連續三年嘅國慶日都去咗不同嘅酒店食自助餐同睇煙花。今年嘅經驗可以話係最差。衛生差其實大時大節食自助餐都預咗同人迫同埋質素參差啲。但係今次我覺得係衛生都好差。其實睇到佢成晚嘅員工都係見習生居多。我哋食燒烤嘅時候就見到佢用同一個鉗夾啲生嘅帶子，再用同一個鉗夾D熟嘅魚俾我食。其實呢一個係好普通嘅衛生常識，生同屬嘅食物要分開處理。自助餐啲食物碟上面有好多水，作為一間四星級嘅酒店，係咪應該花啲錢去裝置一啲暖碟嘅機呢。食物味道差，選擇少沙律嘅選擇就係幾種菜自己mix.冷盤嘅食物海鮮種類尚算可以但,但係味道好難食。我攞咗幾隻蟹鉗拆開出嚟，啲肉係實、完全冇晒水份。老實講即食蟹柳都好食過佢。唯一可以讚嘅係啲即開生蠔，好新鮮但係每次只可以攞兩隻。傳統燒西冷欠奉，有個爐端燒牛肉我哋攞咗兩次，第一次啲牛肉係燒好晒攤喺度：凍嘅，其實可以攞燈照住姐。第二次攞係喺個爐燒緊嘅，結果都只係䁔而唔係而熱㗎。刺身壽司亦都值得一提，啲刺身切完係出緊水。最特別係佢有一個好似蛋糕咁大嚿嘅壽司，我每一次經過都會諗究竟有乜人去食咁大舊壽司？食完應該乜都唔使食。所以成晚我都見到嗰幾舊壽司係冇人攞過。