燒味滷師 (協邦大廈) (已結業)

團年飯除咗食盆菜之外，斬料都係一個好選擇。今日同娘家團年，本來已經訂咗盆菜不過人太多，驚唔夠食，所以又買咗幾盒燒味。呢間燒味店係紅橋，原來仲要新開張。十分難得既係燒鵝係鋪頭燒（我偷睇到個爐），而家好多都係工場大量製作，現場燒真係買少見少。燒鵝係上庄，鵝肉好入味，皮都香脆又唔乾，下次試埋個下庄先。我平時好少食燒腩仔，因為都貴，不過見新開又唔貴就買黎同家人分享下。初初睇以為好肥（我少食見識少），原來白色既唔係肥肉，而係嫩口既豬肉，加埋脆卜卜既脆皮，又唔會好似一般燒肉咁又實又咸，真係幾好食，怪不得燒腩仔比一般燒肉貴啦！不過都貴得有道理。自己都成日整叉燒，不過就好乾。呢間嘅叉燒就好多汁，而且半肥瘦啱啱好。$50半斤都幾抵食，就咁食又得，叉燒炒蛋又得。最抵食喺客家鹹雞。幫你煮埋斬埋都係$59隻，真係平過自己買隻雞嚟整呀！雞都煮得火候剛剛好，肉嫩骨有少少紅又唔會太熟。放工買隻客家鹹雞，煮條菜就可以開飯，真係抵食好食又方便。