韓廚麵 (已結業)

早2年去完韓國之後我地全家都好鍾意食部隊鍋，返到香港之後都一直搵緊邊度有好食嘅部隊鍋，早排呀爸見到呢間有團購，所以就買左喇。呢間舖頭好方便，灣仔地鐵站出左之後行幾步就到。我地之前book左位，所以一入去就可以坐低喇。個團購優惠就係星星炸雞同埋部隊鍋嘅麵係任食嘅，仲有送埋一碟牛肉壽司。個星星炸雞就唔係真係套劇入面個D，只不過係炸雞翼，反而個部隊鍋味道真係幾好，夠香又夠辣，D配料又好多。不過我地全家都唔係好食得辣，所以我地飲左好多水。最後我地總共食左6個麵呀!個部隊鍋有返咁上下水平，同我地喺韓國食個D差唔多，好食!