囍慶藝廚酒家 (已結業)

因為唔熟土瓜灣，就開openrice搵間酒樓同家人晚飯，見呢間都幾多正評，就試一試。環境喺舊區來都算乾淨整潔，座位都幾闊，第一印象不錯。囍慶小炒王，估唔到呢度嘅小炒王係腰果西芹蝦仁，味道還好，腰果幾脆，略嫌鑊氣不足。蒜蓉粉絲蒸元貝，蒜香味一流，呢個蒸得夠出色，元貝幾大粒，粉絲又入味！孜然蔥爆牛肉都不錯，反而比小炒王夠鑊氣，牛肉幾淋，大蔥好香。頭抽銀魚蒸茄子🍆，蒸魚豉油好入味，配合魚乾幾夾，不過有啲茄子切得太大舊，蒸得不夠淋，但味道出色！附送綠豆沙糖水，足料！可惜煲得不夠喉，變成綠豆渣。總括價錢經濟實惠，🍻大枝藍妹啤酒只係$36比其他酒樓平成$5-6，抵飲抵食。