大滾友火鍋 (美新大廈)

營業中

休息中

相約住大埔嘅朋友去呢間知名嘅宮廷式火鍋店食火鍋，入到去真係有啲似置身宮廷一樣，高貴典雅，近入口位置仲有一張大龍椅，好有氣勢！除咗裝修有特色，連餐具、器皿、食物嘅擺盤都好有派頭～龍躉片木瓜魚湯鍋湯底好濃郁，味道超鮮甜，忍唔住飲咗好多碗 。龍躉片同埋木瓜嘅份量非常之多，感覺食極都有。 龍躉片幾乎冇骨，啖啖肉，啱晒我位怕吐魚骨而好少食魚朋友。大滾友牛肉拼盤能夠食到咁多款優質嘅牛肉部位實在大滿足，牛舌、牛頸脊、牛胸爽、牛小排、牛𦟌等等，肉質、口感非常之好。伊比利亞橡果豬超高質嘅豬肉，顏色鮮榨，鮮味十足，薄薄一大片，淥一陣好快就食得！大滾友雜菜拼盤提供菜嘅份量同款式非常多同充足，感覺食極都食唔完咁😜黃金藏嬌和牛墨魚丸造型很特別的，金黃外表嘅墨魚丸，裏面竟然包住和牛粒，爽口彈牙有創意 。黑松露蟹肉餃感覺黑松露加蟹肉呢個組合實在太高級喇，裏面好多蟹肉，實在係首選嘅手打餃類之一。配返榨自家製足料竹蔗茅根，清潤美味 。最後嚟個特色甜品「火焰焦糖豆腐花」，職員即場預備，灑上黃糖、淋上酒，再用火槍燒，面頭即形成輕薄嘅焦糖。食嘅過程也feel到啲酒嘅味道，豆腐花豆香味十足。