星群地中海餐廳 (已結業)

睇左咁多年openrice都無諗過要寫食評，好食唔好食食完就算。但呢間野令我頂唔順到要花時間特登註個冊留個言。食套餐Grill$409，食物燒到變炭，亂疊在兩隻碟上，見到條炭茄子嗎？下面有條德國腸，兩隻羊架，一塊安格斯，三隻雞翼，仲有條秋刀魚，見到真係嚇一跳然後得啖笑！得返蝦、德國腸同埋個青椒食得吓⋯塊安格斯，据足一分鐘都据唔開，做咩姐而家！？樣樣野都有試，無厘味道得炭味，但因為真係太過炭最終放棄！龍蝦帶子天使麵$188，碟麵外表好似ok但原來金玉其外，帶子正常，龍蝦雖乾爭爭但味道正常，天使麵乾得黎又無汁無味，爛得有漿糊既口感，食左幾啖就算。個麵加三十蚊有個餐湯和餐飲，可唔可以講成餐飯最好食係個餐包？我唔係食家，但未試過一間餐廳可以難食到咁，但見佢晚市時間都幾多人食，我唔知，可能佢有其他野好好食掛？定係地中海菜係咁架？埋單$690，永不會再來！早知試隔離間法國菜。