九份•十分 (河畔花園) (已結業)

出去開完個馬拉松會，由於用左太多腦汁嘅關係，放工變得如狼似虎的肚餓，就在附近解決基本需要。其實呢度都幾多食市，但見呢間九份十分響六點鐘已經坐滿左一半，就行入去試下啦，反正我同朋友都好耐無食過台灣菜。說真的，我最鍾意台灣嘅牛肉麵，珍珠奶茶、豬手同肉燥，哈！全部都係濃味嘢。今次都唔例外，叫咗個紅燒牛肉粗麵，呢度做得好好，牛肉軟淋香濃入味，牛筋入味淋滑得黎又唔漿口，粗麵10分出色彈牙爽口，廚師不吝嗇，d餸好多丫。仲有叫左個小食，就係萬巒豬手，諗住係小食只有四、五件，點知上到枱係一碟餸嘅份量（可能廚師知我肚餓😂），豬手做得十分入味，帶有少少醋酸味，淋得黎又有少少彈牙，伴碟的酸菜10分醒胃，仲有中和油膩的作用。仲有叫咗個湯浸肉燥娃娃菜，肉燥香香濃濃帶少少肥，夾在煮淋了的娃娃菜，連唔多食菜嘅朋友都一口接一口咁食。最初唔知豬手咁大碟，所以叫咗個熔岩芝士雞，一上台又係嘩咗一聲，咁大碟嘅，呢個芝士雞除左吸晴外，個內涵仲好紮實，個香濃芝士醬係可以拉絲的，雞又炸得香脆，兩樣加埋一齊真的不得了。我仲叫左杯胚芽珍珠奶茶，最終食到肚裂埋單。滿足！