船皇 (厚福街) (已結業)

疫情期間都盡可能留喺喺屋企，咁啱今日有嘢要出嚟尖沙咀，一於食埋lunch先返去。行經厚福街真係眼花撩亂，太多唔同餐廳選擇。咁啱經過門口見呢間船皇好吸睛，橙色嘅牆身配合埋泰式佈置，感覺好有活力好開心，就入去試吓先。餐廳嘅衛生意識唔錯，枱同枱之間嘅距離好闊落，加上侍應會主動幫客人用熱水浸下啲餐具，令我特別放心。見呢度主打食船麵，我地分別叫咗鷄絲鷄翼湯河，另一個就+$1升級左做和牛船皇湯河， 有和牛、牛丸、雞翼、雞絲、豬肉、豬肉丸、豬潤等等...啲餸好豐富。其實佢就好似一個大雜燴，樣樣有得試吓。個湯底好濃郁，夾雜唔同香料味道，湯底忍唔住清曬。另外首推係豬肉丸，好爽口彈牙，又juicy。豬皮都唔錯，煙煙韌韌有咬口，如果脆d重正。麵底可揀米粉、金邊粉、河粉同蛋麵，亦有湯河同撈麵選擇。闊身河粉好正，滑啫啫索曬個湯底，好正🙏另外我地都加左幾串串燒，泰式香辣魷魚鬚，個辣汁好有層次，慢慢辣出黎，又有少少甜味中和返。魚串就跟燒烤醬，魚肉好實淨彈牙，口感綿密。飲品點了泰式奶茶，茶香滑口。鐘意佢調較番適合香港人嘅少甜口味，配合埋用碗黎飲又另一風味。喺依家未能外遊情況下，都可以食碗地道船麵，一解外遊泰國之愁。