韓閣 (已搬遷) 新店位置

路德圍不嬲都好多好嘢食，最近經過見到呢間韓國餐廳，次次門口都好多人排隊。今日同朋友都比較早放工，黎到咁岩有位，咁就入去試吓啦。雖然呢度客人好多，但係侍應嘅動作都幾快，而且好有禮貌。佢嘅Menu圖文並茂，睇得好清楚。雖然地方唔大，但係坐落唔算迫。我哋叫咗一個人蔘雞湯，因為食韓國嘢一定要試。佢嘅湯底好入味，但一飲就知道冇味精，人蔘同雞嘅味道都好出，而且兩者又好夾。佢嘅雞肉好嫩，雖然煮得好稔，但又唔會鞋。炸雞都係食韓國野必食嘅，我哋揀咗呢個傳統甜辣炸雞。佢嘅醬汁比較特別，甜甜地又唔係好辣，食落好開胃。而且佢仲好細心咁一人俾咗一對手套，咁就唔怕整污糟對手啦。不過最特別嘅係呢個紫菜粉絲卷，本身因為佢嘅價錢好平，本來冇乜期望，估唔到咁出色，嚟食既話一定要試吓呀。野飲方面，我呢杯榛子朱古力好濃，但又唔會太甜，解渴之餘啱晒女仔飲。我朋友話佢杯蝶豆花都好好味，不過我就無試到。呢間餐廳又平又好味，性價比超高，唔怪得晚晚都咁多人排隊啦。