火車頭越南餐室 (浣紗街)

營業中

休息中

今日放假黎銅鑼行下街，諗起都好耐無黎過大坑行下，就順便行過黎睇下，搵下好食的餐廳。見到呢間裝修富有越南濃厚色彩特式的火車頭越南餐室，就入黎試下。夜晚都比較多人，好彩等咗一陣就有位。每桌上會準備咗金不換等香料，可以係食湯河時落去調味。我地叫咗個大頭蝦套餐，$398/兩位，份量多又抵食。招牌火車頭湯河，好大碗，湯底味道濃郁，鮮甜，係用咗大量牛⻣髓出黎，好出味，有扎肉，生肉片，咬落嫩滑而富嚼感，蘿蔔同洋蔥都煮得好軟稔入味，河粉都好爽口滑身。香茅豬扒米紙凍卷，米紙有少少冰凍煙韌，好晶瑩薄透，入面夾有粉絲，生菜，炸豬扒等，食落味道富有層次感，鮮味爽甜。馬拉盞炒椰菜，味道有少少偏辣，炒得好入味，椰菜爽脆清甜，份量多，夠新鮮。蒜蓉牛油焗大頭蝦，下面底仲有兩塊脆多士，蒜蓉的份量好多，焗得香味撲鼻，富有牛油香味，大頭蝦開邊，肉質彈牙鮮甜，呈白色，新鮮夠結實，肉質都吸晒收蒜蓉同牛油的精華，好入味。