郭仔記車仔麵

營業中

休息中

講到香港地道美食，除咗燒賣魚蛋之外，仲有好多，其中一個我最鍾意嘅就係車仔麵，因為想食咩就可以自己加，今日我就嚟到元朗嘅郭仔記，試吓正唔正先！好，坐低睇吓有咩好食先！呢度平均一個餸都係十蚊，都幾抵食。食車仔麵一定要嗌油麵，油麵唔會煮過龍，而佢啲餸就食得出有用心整，豬軟骨炆得入味，金錢牛肚就好冧，食得出香料味，瑞士雞中翼大大隻，豬皮就爽口彈牙，唔錯！河粉索湯，加少少佢嘅自制辣椒醬，刺激味蕾，正！牛筋腩充滿骨膠原，牛筋入口即化，肥牛牛味濃郁，值得一提嘅係佢嘅酸菜，入口嗰刻酸酸地，之後就有微微嘅甜味，最後就有辣味。椰汁紅豆冰，椰汁味濃，飲落甜甜地，紅豆唔會太冧，食得出一粒粒紅豆，正！