寶哥上海味館 (已結業)

今日去到深水埗辦啲事， 去到三點幾都未食過嘢 。非常之肚餓， 去咗附近嘅西九龍中心覓食 。一開始行咗上food court， 選擇的確好多，但係就非常多人， 而且啲位置都唔舒服。 於是我就走返落去下低幾層， 睇下有冇邊間餐廳又抵食嘅下午茶。去到唔記得幾多樓， 見到呢間上海餐廳 。見到入面得一枱客 ，而且位置都幾好坐， 更緊要嘅係我諗起自己好耐冇食過上海嘢 ，於是就坐咗入去 ，連個餐廳名係乜都唔知。打開午市menu, 發現都幾多選擇， 而且一份主菜仲可以拼一份小食，仲有嘢飲 。埋單三十幾至到五十幾蚊， 都幾抵食 。我就叫做一個擔擔麵加三隻小籠包 。等咗大概五分鐘 ，擔擔麵就送到， 賣相一般， 用粟米呢伴碟 ，感覺唔係好傳統 。但係擺入口， 味道的確唔錯 ，最特別嘅係花生醬非常濃郁。 小籠包喺五分鐘之後都送到。 小籠包就真係非常好食 。皮算薄， 湯汁濃郁 ，配合埋醋食非常好食。 呢個價錢 配合呢個環境 ，非常抵！ 坐咗大概個幾兩個鐘先走！