Noodle and Dog (已結業)

有一日同朋友經過皇后大道中，發現有一間外型非常醒目，以黑，白同啡色作主調嘅外賣熱狗店。其實一見佢個logo，就已經好鍾意😁本着試新野嘅心態就去試一試，看到餐牌，原來佢哋d熱狗名都好特別，有秋田犬啦，純種狗啦.... 經店員(後來發覺是老闆)介紹之後，就試下佢哋連餐牌都未有寫上嘅新出品－XO醬狗皇，同煎腸粉加蝦滑！首先用XO醬配熱狗就真係從未試過，香腸可以自由選擇，我就選咗唔辣嘅。一啖食落去，d XO醬辣辣地相當野味，最特別係上面加咗一絲絲黃色嘅鮮檸檬皮，令到成隻熱狗冇咁油膩，反而多了一份清新嘅味覺，令味道充滿層次感，值得推介！熱狗嘅包裝也很細心，方便客人進食。至於腸粉，非常幼滑，加了大量蔬菜，調味適中，感覺非常健康。最特別係佢哋嘅手打蝦滑，混入了馬蹄，味道鮮甜，爽滑，絕非一般行貨。一吃便愛上了😋雖然全程立食，不過由於老細非常健談，不斷會介紹下佢哋其他出品，如腐乳醬熱狗，湯麵嘅湯底係全無味精呀，所有食品可以自由配搭等等。甚至乎佢哋嘅經營理念都分享一下！比人一種小店獨有嘅親切感，令人有一種非常愉快嘅用餐體驗。一定會找機會再來，繼續試下佢哋其他嘅出品！