大澳炭燒雞蛋仔叔叔 (已結業)

11月5日, 我們的122週月快樂慶祝活動就係走入大澳郊遊! 食完大澳小食個香妃卷, 下一站已經諗住去搵黑超伯伯炭爐雞蛋仔食~ 點知兜勻半個大澳, 欣賞水都景色之後都未搵到, 原來我地兜咗個大圈… 雞蛋仔早已入舖~ 仲要喺大澳小食嘅斜對面咋!::: 雞蛋仔 ::: $13好彩我地去到都唔係好多人~ 可以休閒地近距離睇住伯伯整雞蛋仔! 只見帶住黑超嘅伯伯手起鐵板落, 起蹍嘅手瓜熟練地將鐵板反兩反, 幾分鐘後就雞蛋仔已經整好~ 不過仲要攤凍一陣先入袋, 咁先可以保持香脆! 新鮮熱辣嘅炭爐雞蛋仔, 聞落焦香中有少少炭燒味, 食落又特別脆, 仲有超濃蛋味! 不過雞蛋仔嘅質地就好似蛋糕咁, 成舊都軟綿綿嘅, 唔似平時食到d上半係脆脆外層中間漏空下面先係軟綿綿咁~ 但都已經好好食!呢個伯伯真係好有型, 一把年紀但有十分魄力! 睇佢一副鋼條身形, 一定係日日不停手整雞蛋仔所練成~ 真正用炭爐整雞蛋仔嘅地方買少見少, 希望伯伯身體健康~ 可以將呢種獨特風味嘅街頭小食帶比更多嘅人!