城寨風味

營業中

休息中

難得經過九龍城廣場，雖然廣場入邊冇乜人，但係見到有一間餐廳都幾光鮮幾企理，於是入去開飯。入到去座無虛席，佢個裝修亦都非常之古色古香，非常熱鬧。首先我哋嗌咗孜然豬下青，好彩侍應姐姐有講到豬下車係豬頸肉前腿既前部同豬頭相連位，所以食落非常之爽，少少肥膩再用高溫油炸過，加少少孜然粉上去點綴，鍾意食香口嘢嘅朋友仔真係唔可以錯過。另外就嗌咗個金牌鹽燒雞，呢個同普通炸子雞好唔同，外皮炸得非常香脆，雞都非常嫩畫，雞肉咬落去，你食得出係新鮮雞嘅味道，最出色係佢放喺隔離嘅一點秘製醬汁，酸酸甜甜，又唔係鼓油，但係幫隻雞錦上添花。最後不得不提嘅就係砂鍋鮑汁瑤柱炒飯，呢個飯非常足料唔係剩係得爆汁咁簡單，仲有鮑魚肉同雞肉，滿滿嘅瑤柱包住粒粒嘅飯，亦非常有鑊氣，用沙鍋上仲可以keep住炒飯嘅餘溫，惹味得來又唔會非常之鹹。總括嚟講，呢間餐廳可以保留住城寨嘅風味之餘，食物水準亦偏高，真係九龍城廣場嘅一個新蒲點。