Food Garden ETC (已結業)

難得週末同先生一齊放假，決定過返個休閑嘅假期，第一步當然係食返個休閒嘅午餐，先生揀咗位於D2place嘅呢間西餐廳。餐廳嘅午餐選擇雖然唔算多，但各款肉類選擇都有，總揀到一款啱心意，而且價錢已經包餐湯、餐包同飲品，非常合理。是日餐湯味道有啲似甜薯湯，質地微稠，味道清甜。餐包烘到微脆，配上放軟嘅牛油，味道唔錯。牛肉漢堡配薯條份量唔細，厚切薯條新鮮即炸，又香又脆，內裡係香軟嘅薯蓉，非常滋味。牛肉漢堡尺寸雖然唔算大，但勝在夠厚身，麵包烤得夠香脆，夾住煙肉、芝士、美國牛肉漢堡扒、蕃茄、酸瓜同西生菜，實在冇辦法一啖咬哂所有材料，令人滿足。美國牛肩肉有八安士，尺寸雖然唔算巨型，但夠厚身，表皮煎得夠香，無論配上自家製醬汁抑或岩鹽都非常合適。先生揀咗五成熟，色澤粉嫩，而且冇血水，入口軟嫩，牛香味重。鮮果冰茶冰涼爽口，配上新鮮檸檬味道清新。餐廳食物質素唔錯，價錢合理，想喺週末忙裏偷閑，逃離呢個石屎森林，絕對係一個好選擇。