淂記 (已結業)

放假去左銅鑼灣行街，行過利園三期見到有間新餐廳，門口有大大隻鴨仔，好可愛！適逢週末有「填鴨點心放題」，可以任食烤北京填鴨同多款點心，咁吸引，一於試下先！店內裝潢時尚又摩登，揉合中西歐陸風情，餐桌、吊飾都好靚，滿滿都係打卡位～揀左「週末任點填鴨放題」，任食片皮鴨、多款冷盤、點心、湯羹、主食等，款款都好吸引，勁期待！！必點片皮鴨，鴨皮夠薄身，油脂酥香鬆脆，鴨肉厚薄適中好均勻，肉質相當嫩滑。餅皮煙煙韌韌，再配上爽脆青瓜、京蔥、甜醬同食，入口充滿豐腴油香，夠哂滋味。冷盤推介黑魚子煙燻初生蛋、陳醋小排骨，半熟糖心蛋味道濃郁豐富，口感細緻帶煙燻幽香；陳醋小排骨肉質嫩滑，酸酸甜甜，夠哂開胃。點心推介蟹子帶子燒賣、松露素餃、冬菇鴨肉包，燒賣爽口彈牙，加入鮮甜帶子，口感更鮮美；松露香氣濃郁，咬開有爽口野菌同蔬菜，有驚喜；冬菇鴨肉包造型好獨特，鴨肉甘甜有嚼勁。湯羹推介上海雲吞鴨湯，奶白色湯頭清澈鮮甜，加上雲吞、菜蔬，味道帶點鹹香，好香濃。主菜推介糖醋鍋巴魚、孜然羊肋排，糖醋鍋巴魚，外酥內嫩，酸甜又可口；孜然羊肋排味道鮮美，外脆內軟好惹味。甜品有淂記豆腐花、楊枝甘露，豆腐花口感滑溜，配以黃糖，甜滋滋特別好食