德美壽司

營業中

休息中

今晚搵食到德美壽司。呢度算係尖沙咀地段少數又唔貴又好味嘅日式餐廳，環境相對地熱鬧，有啲似居酒屋風格，同三五知己一齊飯聚就最適合。菜單方面都應有盡有，真係好想每個種類都試吓，可惜我個胃同銀包一樣咁細XD最後點咗壽司、串燒、天婦羅、石頭鍋飯。壽司盛合 美池魚、帶子、三文魚、車海老、油金魚、赤身、三文魚子、鰻魚、京葱拖羅蓉小卷。每件都鮮味十足，唔係連鎖店貨色或者腥腥壽司。串燒牛舌幾乎每次都會點，最欣賞係皮脆肉彈牙，牛味夠濃，只係太細份唔夠喉。溫泉蛋天婦羅軟綿綿嘅流心蛋外層包住脆口嘅天婦羅炸粉，唔油膩，蛋味香濃，手工一流。廣島蠔石頭鍋飯我自己嘅食法係將南瓜、里芋、紫薯等野菜連同醬油完全攪勻融入鍋飯當中，別有一番風味。而蠔嘅肉汁鮮味都有留在鍋飯入面，相當出色。餐廳服務都好周到，加茶收碟時間掌握得好，最後甜品三色糕係餐廳送嘅，紅豆、椰汁、抹茶，上面有芒果醬，好滿足。