天晴日本料理 (已結業)

午市有鰻魚飯、牛肉飯、壽司、刺身等定食，我揀壽司類之中較貴嘅｢極上壽司定食｣❨$168 加一❩，見圖。份量唔細，但海鮮嘅級數唔見得有乜咁極上。雖然咁嘅價錢，期望都唔高，但喺元気可以平啲價錢食到同等質素。另外，我食開嘅定食都係食完壽司至上烏冬，呢間掉轉，烏冬一早上，我唔想食壽司前已飽咗一半，結果碗烏冬攤到凍哂。食到尾聲，近兩點，客走得七七八八，可能壽司師傅太得閒，拎部手機出嚟㩒。我初頭都無為意，但過咗起碼五分鐘，見佢仲㩒緊，於是影咗呢張相❨加工遮咗臉❩。玩手機有乜問題？一 . 唔尊重客人，唔尊重自己。話哂係日式料理店，唔係茶餐廳，玩手機都唔好喺正客人面前呀。二 . 唔衛生。大家都知，壽司師傅處理食物唔戴手套，我見呢位師傅玩手機時都冇戴套，點知佢轉頭處理食物前會否先洗手。總結：食物勉強合格，師傅嚇人，唔再幫襯。