奧壽司

營業中

休息中

今次食呢間日本餐廳食物種類好多，除左有壽司刺食外仲有好多選擇，想輕食啲嘅有小食、沙律、串燒，飽肚啲嘅亦有烏冬、拉麵、炒飯同鍋物，一應俱全！我就點左一個特上壽司盛合、忌廉香蒜酒煮蜆、小食拼盤、燒牛舌、餃子雞翼、蟹粥同梅酒。小食拼盤岩曬我呢個有選擇困難症嘅人，可以試到四樣小食前菜，魷魚同芥辣八爪魚送酒一流！之後串燒同壽司都好快到，當然要食熱食先啦！厚切牛舌燒得好香，食落彈牙好味！而餃子雞翼釀左滿滿嘅肉，肉汁豐富！到壽司喇！有我最愛嘅海膽，好新鮮完全無腥味，入口非常creamy！帶子同蝦都大大隻又爽甜，而其他魚生色澤都好新鮮有水份，唔會乾爭爭，唔錯！餐廳有清酒煮蜆同忌廉香蒜酒煮蜆可選擇，而我就揀左後者，蜆肉大粒飽滿，份量亦不少，仲有塊蒜蓉包，用黎點埋剩下嘅忌廉汁，正！而最後黎嘅蟹粥非常驚喜，不單止有一隻三點蟹，仲有兩三片海膽，令個粥非常鮮甜！其實個粥嚟嘅時候我地已經飽飽地，但係真係好好食所以最後清晒，好滿足嘅一餐！