101手工涮涮鍋 (已結業)

夏天都係打邊爐嘅好日子，去到呢間餐廳，火鍋套餐選擇多，一定啱晒香港人口味。首先有叫左呢個冬瓜卜卜蜆鍋，蜆肉數量十分之多，而且每隻蜆肉都夠飽滿，加上冬瓜係火鍋材料之中，湯底夠晒鮮味。接著有呢個海鮮拼盤: 有新鮮蠔隻、生蝦、馬刀貝，蠔隻上枱時已經聞到陣陣鮮味，放入湯中，更係啖啖鮮味滿足。而馬刀貝亦係份量十足，飽滿之餘亦彈牙具咬口。手切安格斯肥牛片，脂肪比例分明，入口既有牛肉肉香味道，亦有嫩滑口感，係滾湯中大概30秒即刻食得。而手工火鍋拼盤，食材就更加豐富，有太極冬茹、蟹肉餃、芝士墨魚丸、蝦丸、霜降牛丸等等，保證大家一定夠飽。而各款手打丸極為出色，絕對唔係平時啲打工食品，而係食到豐富嘅肉味，彈牙十足，加上芝士嘅點綴，味道更有層次。而新鮮即炸嘅響鈴、魚皮，亦係打邊爐必點之選，件件份量都唔細，而且香脆無比，浸一浸湯底吸收精華，非常之好味！最後有青蘋果可樂沙冰，冰涼感覺，加上青蘋果清新味道，最啱夏天飲。而紅棗雪耳涼粉，甜味適中，加上涼粉爽滑口感，一人食一客就最滿足。