Vive Cake Boutique (已結業)

其實早喺四月尾已留意到利東街將會有新蛋糕店「Vive Cake Boutique」登場。等到五月二十七號，終於盼到店子開張。「Vive」用上雲石打造o既外牆配上店內以粉紅色為主o既裝潢，柔和得黎大方雅麗。落地玻璃身後o既蛋糕模型以高高o既雲石枱承起，配上簡潔o既圓枱散座，感覺清爽企理。正門旁擺放o既鎮店蛋糕模型更是吸引動人，途人路過都不禁行近望多兩眼。收銀處有兩個雪櫃，其中細小嗰個雪櫃陳列出精緻o既迷你蛋糕仔及馬卡龍。櫃面仲有束靚靚o既鮮花襯托埋，四周都流露出高貴o既氣質。埋喺牆身較大o既雪櫃則擺出原裝大細o既蛋糕及飲品。小肥其實一早已喺網頁上揀好想訂「Summer Flourish」（夏日繽紛）送俾長輩賀壽。不過循例都向兩位靚女姐姐索取單張，參閱一番。店員雖然係生手咗少少，不過勝在態度友善，笑容滿臉，客套有禮。由於新店仍屬試業階段，付款後發票要經電郵後補。嘩，除咗蛋糕外觀精美，高高o既粉紅粉白硬身紙袋以銀字熨出店名，再加配銀色蠟燭，就連包裝都一樣咁有睇頭。Summer Flourish（夏日繽紛） - Layered Sponge Cake in White Peach Mousse