元気寿司 (屯門市廣場1期)

營業中

休息中

老婆生病了😷，費事佢煮飯辛苦，就建議哩一兩日買外賣算數。最後預早一日訂咗元氣壽司🍣。我哋叫咗特選壽司盛C，原價$133，但咁啱佢做緊網上訂購外賣自取優惠，減$14，盛惠$119。另外，我哋仲加咗大切三文魚腩壽司$20、腐皮壽司$12同飛魚籽軍艦$12各一客。特選壽司盛C都算抵食，裡面有帶子壽司、赤海蝦壽司、甜蝦壽司、三文魚壽司、三文魚沙律軍艦各兩件，及蟹籽壽司同赤貝壽司各一件，總共12件。真係估佢唔到，我哋最欣賞嘅竟然係三文魚沙律軍艦，唔知係咪加咗沙律醬，所以覺得特別惹味，三文魚食落亦更加肥美嫩滑彈牙。帶子壽司都唔錯，厚身結實，味道新鮮甘甜，無乜腥味。三文魚就比較失色，薄身之餘，食落亦比較乾身嚡口。其他都不錯👌🏼。大切三文魚腩壽司亦比較失色，肉質較結實，唔夠肥美，無乜魚油香味，亦無入口即溶嘅感覺。腐皮同飛魚籽壽司則正常發揮，新鮮好食。