卷王 (已結業)

係旺角掃街, 通常都係魚旦燒賣果啲地道野, 今次經過想食手卷, 就試下呢間。雖然有大大塊牌有好多款手卷可以揀, 但呢到幾得意, 有得自己揀中意咩配料唔一定要set死左, 幾正, 而且一次過可以係12款入面揀4款。揀下揀下見佢有丼飯set喎, 五十幾蚊己經有交易, 所以我就投向丼飯既懷抱XD北海道刺身丼 $58呢個最平, 但都有齊我想食既帶子三文魚 鮮蝦同埋玉子, 即叫即整, 所以啲仲係温熱既, 同埋個盒好大, 裝到好多飯。三文魚一共五片, 疊埋左但原來每塊都好長身同埋幾厚, 較稔身口感柔軟, 幾新鮮, 不過味道唔太濃, 反而最鮮甜係帶子, 切左薄片都依然食到彈柔並重既口感, 玉子有兩片, 偏甜, 蝦刺身size都唔細, 對得住個價。反而飯都幾有驚喜, 因為用左日本米, 唔會話咁大碗就比啲HEA飯, 每粒都做到黏口果種日本米獨有既質感, 有個加分位係飯面灑左芝麻, 令佢更香口。餐跟埋可樂一罐, 不過我唔揀可樂, 但無其他野飲揀~豉油有唔辣 小辣 同大辣揀, 自己想唧幾多就幾多。