重慶劉一手火鍋店 (旺角商業大廈) (已結業)

旺角特別多邊爐放題，今日想去有特式嘅火鍋店試下！嚟到呢間以重慶火鍋做招牌嘅，當然要試下麻辣鍋啦！今次叫個小辣試試牛刀，由於得兩個人，所以都係叫返招牌款式同多人推介嘅餸。特別要提，呢間招呼好好，服務員好有禮貌，仲好貼心添！講返食物，我哋叫咗一個大盛極尚牛肉拼盤，嚟到都嚇一跳，估唔到份量咁多，望落都好新鮮。有大大片雪花肥牛、日本和牛、極品手切牛肉、澳洲和牛小排同埋一口和牛舌，講真樣樣都好好食，當中要重點提係日本和牛同一口和牛舌，聽個名已經好吸引，而且食落好有牛味之餘，亦好嫩口，絕對要一試！另外要推介係個丸拼盤B，入面有兩款牛丸、芝士丸同墨魚丸。牛丸夠彈牙、芝士丸有口感，我最欣賞係墨魚味好重嘅墨丸！好少可以打邊爐食到咁高質嘅墨丸！