火鍋撚 (染布房街) (已結業)

今日同朋友一齊去食飯，打算打邊爐，因為我哋兩個都唔係十分大食，所以選擇非放題嘅邊爐，最後嚟咗呢間火鍋撚！店舖幾有懷舊風味，好似去咗啲老客棧打邊爐咁，二人枱都好闊，坐得舒服服務態度亦都唔錯。首先揀湯底，我哋揀咗酸菜白肉鍋，出乎意料之外，湯底價錢唔算貴，但係入面嘅配料真係非常多，勁多酸菜同埋白肉，好抵食，酸味唔會太重。之後我哋嗌咗一對邊爐配料，包括海鮮類，有鴛鴦雙蚌、白鱔，珊瑚蚌同埋桂花蚌口感都幾爽，新鮮！最最最值得欣賞嘅係呢度丸類選擇好豐富，亦都可以揀半分或者一份，因為太多選擇啦所以我哋好多都想試最後各樣嗌咗半份，包括係龍蝦湯同埋黑松露爆漿牛丸，真係有爆漿效果！另外仲帶咗幾款蝦滑同墨魚滑，幾有特色，係自創，唔係周圍都食到，包括係瑤柱干貝滑、香菇貝鮑滑，值得一試。同埋仲有佢哋嘅滷水拼盤，用店舖名做菜式名，應該都係主打同埋招牌，果然質素都好好，滷過一轉之後已經夠晒入味，而且唔使烚好耐，牛筋超林口感好好！ 總括嚟講，呢間邊爐嘅質素都唔錯難怪有咁多間分店，遲啲應該越嚟越容易就可以食到。