貴川風味館

營業中

休息中

今日陪朋友去中旅社攞回鄉咭，大家好耐冇見傾左好耐，諗住响附近食埋中午飯先返屋企。一個中意麻辣一個中意酸辣，所以去左唔係離地鐵站好遠既貴川，見到舖頭細細裝修普通，所以企响門口睇左餐牌先入去。朋友點麻辣米線，加配肥牛腐竹，肥牛剛熟唔起渣，腐竹冇煮到溶掉，佢話又麻又辣食到條脷痺痺地好爽。我點酸辣米線，米線加配山根豬軟骨，豬軟骨炆得好淋，山根吸收哂湯，酸酸辣辣感覺好開胃。小食點口水雞，辣味適中，雞肉嫩滑，芫茜非常多，好中意撈埋一齊食，份量足夠兩個人食。約好朋友下次再黎食過。