唐宮中餐廳

營業中

休息中

今晚朋友請食飯，帶我嚟一間我未到過嘅酒店中菜廳，佢喜歡多菜小肉，對我呢啲唔食齋而齋食肉嘅人嚟講梗係齋左啲啦，不過朋友請食飯，我自然恭敬不如從命啦。清清地，唔錯，不過佢都體諒我，叫返碟肉嘅。不過環境真係一流，傾計啱哂，唔怪得佢約我嚟傾計啦，雖未致於包場，但都客人唔多。有時我真係會諗佢地點為皮嘅呢，講真，食晚飯傾計嚟呢度，我推介，不過如果越嚟越多人嚟食飯傾計，佢嘅環境優勢就無哂喇。講返餐飯先，二個菜，上湯浸菜和肉鬆四季豆，不過不失，可以講小菜一碟，食完唔會特別有記憶，絕不難食，但要話好食呢？仲未有呢種感覺。特別嘅餸嚟喇，南昌粉蒸黑豚肉伴紫薯，聽到個名都想叫啦，不過點菜時我未嚟，當個餸嚟到，我就問佢咩係南昌粉？佢竟然答我，唔好意思呀，我新嚟嘅，唔知呀，哈哈，不過我地都照食啦，只係我八掛啫。食落......我就對南昌粉無咩興趣，好彩啲黑豚肉(咪又係豬肉，其實我分唔出)) 都算蒸得唔錯，幾爽口，唔會太肥，反而個紫薯就最正，最驚喜，好甜，雖然好飽，食幾件已成碗飯咁。食飽飯，傾飽計，回家去也。地方唔錯，環境啱哂俾人傾下計，夠哂靜，食物就未見特式，或者同我地點嘅餸有關係啦，一於下次試下其他先。