素食一家 (已結業)

出去同朋友食飯經常大魚大肉，多肉少菜，所以今次我就提議食素食，同大家清清腸胃。無諗到餐廳面積幾大，而且座位寬敞。金莎蘆筍苗將蘆筍，菇同鹹蛋黃一齊炒，炒過嘅蘆筍仍然爽脆，整碟菜都充滿濃郁既蛋黃香，不過食多幾啖我覺得味道鹹左少少。鮑片麒麟豆腐最頂層係花菇，之後係素肉，鮑魚菇同墊底既豆腐，蠔油芡味道濃郁，不過西蘭花略嫌太硬，好彩墊底既豆腐口感軟滑而且有豆香。圍村蓮藕餅咬落去食得到蓮藕絲，非常爽口，可惜炸粉較厚，而且炸得太油膩。薑茶菊花賣相十分精美既一道甜品，盡顯廚師既刀工，把質感軟滑既豆腐切成長短一致既菊花狀，口感嫩滑，糖水薑味濃郁﹗ 有機可樂比想像中好飲，好過健怡可樂。而且成份天然， 不加防腐劑及無咖啡因。雖然今次既食物唔係全部都令我滿意，不過餐廳既服務態度良好，又細心解答我地既問題，希望將來會見到餐廳既改善。