文輝墨魚丸大王 (已結業)

隔離沾仔記要等位，啲阿姐又無心招呼，唯有走去附近望望啦，見到呢間文輝墨魚丸大王有位，仲要係有幾枱吉枱咁多，正喎，咁大個伏，梗係要入啦。銅鑼灣嗰間文輝十年前成日飲完酒都會去食返碗河粉先至返屋企，印像中嗰度嘅河粉係好滑溜嘅，今日嚟到呢度，見到隔離位嗰個撈好嘅沙爹牛腩撈麵咁吸引，唯有捨棄個河粉啦。點知我碟麵一嚟到就俾班朋友笑我碗麵淋 pat pat 咁，重要係螢光色，咪笑住，等我撈勻佢先，撈勻咗夾埋啲啡色嘅牛腩汁之後，果然唔見哂啲螢光色喎，跟手食一啖落口，個麵真係煮得太淋喇，就算個牛腩汁有幾好味都補救唔番，其實個牛筋係炆得好味嘅，夠淋得黎又入味，牛腩就鞋烚烚喇，完全唔惦啊。另外發現凍飲嘅飲筒比見開嗰啲好似短咗一截咁，唔知係咪有人修剪過呢？