古味坊 (已結業)

古早味蛋糕近年越來越受歡迎，舖頭開到成巷成市，濃郁嘅蛋香味加上軟綿綿嘅口感，可以話係大人及小朋友嘅至愛，今日嚟到元朗探朋友總唔可以兩手空空，見到途中呢間古早味蛋糕舖，一於買黎送禮啦。 同好多古早味蛋糕舖一樣，呢度嘅蛋糕有好多款口味，鹹嘅甜嘅都有，可以選擇買一個/半個或片裝，最後買左一個伯爵茶味，另外各買左一小件朱古力味及黑糖味俾朋友兩個小朋友。伯爵茶味蛋糕賣相呈淡茶色，相當吸引，蛋糕散發出淡淡茶香味，食落伯爵茶味濃郁，味道唔太甜，口感濕潤鬆軟，雖然同朋友只有兩個人，但一人半件都覺得唔夠喉。朱古力味蛋糕夾有朱古力粒，入口有好香濃嘅朱古力味，味道甜得黎但唔會覺得好膩；黑糖味蛋糕雖然改用黑糖，但味道都唔會覺得好甜，有淡淡黑糖味之餘，亦可以食到蛋糕嘅蛋香味，兩件蛋糕小朋友都好喜歡。