小巷弄

營業中

休息中

開o係豪宅基座商場o既台灣o野，靠近商場正門，內裡都係木色系為主，唔少台式餐廳都採納呢隻小清新style！雖然以牛肉麵自居，但其實佢仲有好多其他特色o野食，而且有下午茶餐，$30 幾$40 連埋飲品，天口興一於入o黎涼下冷氣嘆番個tea。手抓餅係台灣夜市名物，自然唔叫唔得！有兩隻口味，可以揀牛肉香蔥或者起司蛋(跟餐都係$40 無加一)，試o左前者。一大卷o既蔥油餅，餅底煎至脆口，裡面o既牛肉原來用上牛展，填入多多椰菜絲，再加o左隻類似泰式辣醬o既醬汁，吊味得o黎又少少辣咁～見到隻蘸滿滷水汁o既雞脾，相信無人可以抗拒唔流晒口水……隻滷水大雞腿(跟餐$35) 上檯時可以感受到o個股熱力不停攻出o黎，非常新鮮熱辣！醬汁深沉o既顏色味道濃甜，雞脾肉又肥美，讓人很回味。上面兩個餐都可加錢配個小碗湯米粉(加$12)，或者好似我地配下小食又得。炸花枝丸($16/3 粒) 被炸至金黃色，過口癮一流，最重要係瀋上鹽酥雞o個隻鹹辣粉，特別有風味～餐飲朋友健康d 寫o左杯杏仁茶(凍飲加$3)，我就偏好珍珠奶茶(凍飲加珍珠共加$8)，呢間d 茶味好出，茶底帶點薄荷氣息。