大家樂 (T Town South)

營業中

休息中

天水圍站📍大家樂-呢排疫症日日煮，有時都煮到心好累，想出街買外賣，又唔係間間開，唯有食大家樂。而家見到佢有個外賣快餸，有肉有菜有飯，試試佢。外賣快餸（$105/3款）分別試咗滑蛋粟米魚塊、菠蘿咕嚕肉同埋燒味雙拼。份量來講都唔算少，滑蛋粟米魚塊一貫水準，不過可能外賣原因，魚塊就比較淋咗少少，如果多番啲汁更加易送飯。菠蘿咕嚕肉啖啖肉就啱晒我呢個食肉獸，醬汁都幾濃，酸甜開胃。燒味雙拼就一般般啦，叉燒比較瘦，油雞冇乜肉，旁邊啲花生俾醬油浸淋晒。另外+15就可以有埋兩碗白飯、一個油菜、兩碗糖水。買得外賣就梗係唔想煮唔想洗啦，一於加埋。飯都幾大盒，糖水都足料好味，不過油菜份量就比較少，唔知係咪同近來菜價貴有關。買夠$100用八達通俾錢仲可以有九折，今餐埋單都係$108，兩個人都食唔晒，而家仲頂住個胃😹三個人食就啱啱好啦。百零蚊來講都算唔錯啦，係冇乜店舖揀嘅情況之下，都算係一個好選擇。而且包裝都好衛生企理。