飲茶 (朗豪坊) (已結業)

講起飲茶, 好似向來只係上左年紀嘅人先鐘意, 但呢間"飲茶"就夠有創意, 等你睇得又食得, 唔止後生仔鐘意, 連大人都話得意!但係朗豪呢間嘅環境真係唔太好, 隔離係food court, 只有一條扶手之類嘅隔住, 外面D鐵板呀各種重味嘅食物味道飄晒過黎, 係有D攻鼻, 似係food court入面食咁。當然我平時都會食food court, 但如果入餐廳食就會想個環境好少少。隻碗幾有特色幾靚, 好似有條魚係度游緊水咁。呢個叫一籠八戒, 勁可愛, 其實係叉燒包, 食落又幾好食!呢個真係流心架, 而且奶黃餡好香鹹蛋味, 真係唔錯。連個鳥籠都出埋, 真係要讚下佢嘅心思。佢實質上係鳳梨酥, 味道其實係一般, 不過賣相加分。呢個近墨者黑真係夠晒黑, 賣相黑得黎但唔靚, 食落又偏咸, 好失望。彩色蝦餃睇落係幾靚, 都夠大隻, 但味道一般。燒BB鴿係幾好食, 不過比出面嘅BB鴿再BB d。呢度sell賣相, 大部分嘅點心又真係幾靚嘅。不過味道屬於正常但價錢偏貴, 其實真係試一餐半餐都夠了。