梁記餃子麵坊 (已結業)

好耐無入元朗，基本上一年先入一兩次，入元朗搵食之前當然要做下功課啦，老婆話想食餃子，今次去咗友人介既梁記餃子麵坊。人生路不熟都要搵左一陣，門口冇乜人，有少少伏，因為諗住午飯時間會排長龍，入到去先有一半滿。坐低睇下個餐牌，選擇唔多但係餃子幾特別，用青瓜沙角青椒南瓜等等嚟做做餃子，出面比較少見，於是就揀左 一個鮮菇青椒餃子併魚肉雲吞淨食，加杯香菊蜜同一個酥炸鯪魚球。香菊蜜先嚟，大大杯冇乜特別，有啲淡口，好在唔甜，有好淡口嘅菊花香，杯野都係加四蚊，所以唔要求。餃子呢，魚肉雲吞其實即係鯪魚肉用雲吞皮包住，其實冇乜特別，不過佢個魚肉打得彈呀，味道亦好。個鮮菇青椒餃子，青椒感覺上煮耐咗好淋，佢啲鮮菇都唔會有好香嘅菇味，組合特別唔難食，但係都唔算好好食。反而個湯底，有好重嘅胡椒味，對唔食辣既我黎講好辣，但係好香。不過個湯底嘅辣味都蓋過咗啲餃子味。反而要推介嘅係佢嘅酥炸鯪魚球，粒粒都好大粒，而且味道較得好，配料用量恰到好處，好好味。 外面 炸到香口而煙韌 ，入面啲魚肉都好彈牙。佢仲有好多餃子可以試，不過已經好飽，淨係食兩三粒鯪魚球都已經係夠一餐有餘。走之前座位爆滿，原來係我早左者。