華記小廚 (已搬遷) 新店位置

有一個朋友從廣州黎到，原求想帶佢去食大排檔，但去到愛民生，出面已經有好多人等緊，個個都想坐室內，所以都係決定放棄。係嗰個位又唔知邊到好食，最後就隨便過對面一間～八點鐘已經滿哂人，得返一張搭檯。不過都冇乜所謂，反正入面都幾嘈，都唔會坐得耐。因為見到差唔多每一檯都有一大碗紅卜卜嘅水煮魚，應該係招牌菜，又點可以唔試下呢～水煮魚嘅份量好大，有好多應該係桂花魚塊，好滑亦無骨。另外入面已經包咗一啲配菜，有芽菜，鴨血，同埋寬薯粉。雖然叫咗中辣，但係並唔係好辣架咋，唔好比佢個樣呃到，下次叫大辣都可以。另一樣嘢就係家鄉蓮藕餅，本來以為係有兩塊蓮藕夾住嗰一款，但原來蓮藕已經切咗粒係肉餅入面。調味唔錯，亦都好香口。只係因為蓮藕已經切粒嘅緣故，唔係好有咬口，冇乜蓮藕爽口嘅感覺。最後就係前菜海蜇萵筍絲，但唔知點解反而最後先上。成碟都無乜特別，可以唔需要試。