新南苑雞煲小菜點心 (已結業)

雞煲，小菜，點心，一次過滿足幾個願望！睇餐牌仲有鐵板，酸菜魚同水煮魚等，選擇幾多元化，而且價錢平民化，至於食物質素，我覺得都幾好，性價比高。見到好多枱食客都叫雞煲，可惜我得兩個人食，所以今次無試招牌雞煲。見有得飲夜茶就叫左籠金箔蝦餃皇 $30同#櫻花蝦燒賣 $26，每籠三粒，金箔蝦餃好睇又好食，皮薄餡靚；燒賣幾大粒，係豬肉同蝦肉餡，面層櫻花蝦蒸熟左好似蝦米咁，少少脆口。之後叫左碟腐乳通菜炒牛肉 $68，份量好足料，牛肉大塊又好腍，搭腐乳味又Match喎，餸飯一流。脆米鹹檸檬海鮮炒飯 $68 呢個配搭好新穎，將鹹檸檬加上蝦仁，帶子粒，菜頭等炒飯，味道與口感好獨特。而炒飯本身亦炒得乾身，粒粒分明。最後甜品叫左抹茶流沙煎堆 $28，賣相幾呃Like，抹茶味煎堆加上流心抹茶漿，香濃得黎又唔會太甜，正！叫左凍飲計半價，凍奶茶 $10，維他奶紅豆冰 $12，第一次飲覺得幾特別，幾好飲。